Tuanzishe kilimo
cha umwagiliaji
Julian Msacky
MJADALA unaoendelea nchini kwa sasa ni kama tuna tatizo la
njaa au la.
Wananchi wanaotoka vijijini ukiacha tuliopo mijini wanasema
kuna ukame. Mazao na mifugo vimeathiriwa.
Hii ina maana kuwa sisi kama nchi tuna kazi ya ziada ya
kufanya kuhakikisha tunaondokana na hali hiyo.
Kama njaa ipo haitaisha kwa maneno. Kama ukame upo
hautaondoka kwa maneno. Ni lazima tukubali hilo.
Tukikubaliana tunakaa chini kama nchi na kuweka mikakati
madhubuti ya kukabiliana na tatizo husika.
Ni kwa njia hiyo pekee tutapata suluhu ya kudumu badala ya
kuendelea kuvutana. Sasa nini kifanyike?
Kuna umuhimu wa kijikita katika kilimo cha umwagiliaji kama
ilivyo Misri. Huu si wakati wa kutegemea mvua.
Si wakati kwa sababu maeneo mengi duniani yanakabiliwa na
tatizo la mabadiliko ya tabianchi.
Mabadiliko hayo kwa kiwango kikubwa yameathiri sekta ya
kilimo na mazingira kwa ujumla wake.
Yapo maeneo ambayo mazao yalikuwa yanastawi vizuri, lakini
hali imebadilika na wakulima wanalalamika.
Kutokana na mabadiliko hayo hatuna tena uhakika wa mvua. Hatuna
tena uhakika wa kilimo.
Hatuna tena uhakika wa kupata nyasi za kulisha mifugo yetu.
Hii ni changamoto kwa kila mmoja wetu.
Mabadiliko hayo yanatokana na kazi zetu sisi wanadamu.
Tumeharibu mazingira vya kutosha.
Kwa hiyo tunatumikia makosa ya kazi ya mikono yetu kwa
kuharibu mazingira yanayotuzunguka.
Kwa kuharibu mazingira mvua sasa zinapatikana kwa kusuasua.
Ndiyo maana kilio kimetawala kila mahali.
Mikoa ya kaskazini imeanza kuathiriwa na ukame kutokana na
kukosa mvua. Hali haikuwa hivyo siku za nyuma.
Wakulima wanalalamika. Wafugaji nao wanasema yao. Je,
tutamaliza tatizo la ukame kwa kulalamika? Jibu ni hapana.
Kwa hiyo njia sahihi ni kuwekeza katika kilimo cha
umwagiliaji ili kujihakikisha usalama wa chakula.
Wataalamu wa sekta ya kilimo na umwagiliaji ni lazima
wafanyie kazi ya ziada ili kutufikisha huko.
Bila kufanya hivyo tutaendelea kupata misukosuko wakati suala
hilo linaweza kupata ufumbuzi wa kudumu.
Katika dunia ya leo ni aibu hasa nchi zetu za Afrika
kulalamika hazina chakula cha kutosha.
Hii ni kwa sababu tuna ardhi ya kutosha. Rasilimali watu ya
kutosha. Tuna mito ya kila aina nchini kwetu.
Katika mazingira hayo hatuna sababu ya kukosa chakula cha
uhakika. Muhimu wataalamu wanoe bongo zao.
Wazungumze na wenzao duniani namna walivyofanikiwa kuwekeza
katika kilimo cha umwagiliaji. Tutafika tu.
Kama wataalamu wapo, mito ipo, ardhi ipo na hali ya hewa
ambayo si mbaya, ni kwa nini tulie njaa?
Ni imani yangu kwa uongozi makini wa Rais John Magufuli hili
la kilimo cha umwagiliaji linawezekana.
Kama alifanikiwa kusimamia barabara tunaozoona, kutumbua
majipu kwake kilimo cha umwagiliaji kinawezekana.
Ndiyo maana ninaamini akisema kilimo hicho kiwe agenda mama
tutaona matunda yake muda si mrefu.
Ni suala tu la kujipanga na kuhakikisha suala hilo
linatekelezeka kwa ustawi wa nchi na watu wake.
Mwaka 2001 aliyekuwa Rais wa Marekani, George Bush alisema usalama
wa nchi hiyo ni chakula.
Watu wakishiba ni rahisi kushiriki shughuli za maendeleo
vizuri. Watu wenye shibe ni mtaji kwa nchi.
Na huo ndiyo utajiri wenyewe maana watu goigoi ni vigumu hata
kukabiliana na maradhi pamoja na umaskini.
Ndiyo maana kwa Marekani usalama wake ni chakula cha uhakika
kwa watu wake. Ni muhimu kujifunza hili.
Pamoja na hayo ni muda muafaka kwa wananchi kusikiliza
wataalamu wetu ili kuhakikisha hawapotezi jasho lao bure.
Tukishauriwa kulima mazao yanayohimili ukame tuzingatie.
Vivyo hivyo katika kupunguza mifugo yetu.
Lengo ni kuhakikisha tunaepukana na matatizo ambayo hayana
ulazima katika maisha yetu ya kawaida.
Pia tuhakikishe tunatunza mazingira ili yatutunze kwani
tusipofanya hivyo itakuwa kilio na kusaga meno.
Kwa upande wa serikali ifanyie kila linalowezekana kupanua
wigo katika kilimo cha umwagiliaji.
Hapo tutajihakikishia usalama wa chakula pamoja na viumbe
wengine na si vinginevyo.
Ni rai yangu kila mmoja kwa nafasi yake atachukua hatua kwa
ustawi wa nchi yetu badala ya kulalamika.
SHARE
No comments:
Post a Comment