TBS YATOA DARASA KWA WALAJI WA BIDHAA

                                                              Gladness Kaseka

MWANDISHI WETU

SHIRIKA la Viwango Tanzania (TBS), limewataka walaji na watumiaji wa bidhaa mbalimbali kuhakikisha zinakuwa na nembo

ya shirika hilo. 

Mwito huo ulitolewa jana na Ofisa Masoko Mwandamizi wa TBS, Gladness Kaseka wakati akizungumza na waandishi wa habari katika

viwanja vya maonesho ya Sido Kanda ya Kati yanayofanyika Uwanja

wa Chipukizi mkoani Tabora. 

Alisema faida za kununua bidhaa yoyote yenye nembo ya ubora

iliyotolewa na TBS huthibitisha pasipo shaka kuwa bidhaa husika iko

katika kiwango kinachokubalika na inafaa kwa matumizi ya binadamu. 

Ofisa huyo alisema kuwa bidhaa iliyothibitishwa na shirika hilo huongeza ubora wake na kuinua soko lake ndani na nje ya mkoa husika ikiwemo nje ya nchi na humpa uwezo mzalishaji kushindana vizuri zaidi sokoni.

Alitaja faida nyingine ya uwepo wa nembo ya TBS katika bidhaa humwongezea wateja mzalishaji na humkinga dhidi ya ushindani wa bidhaa hafifu zisizo na ubora ikiwemo kuaminika zaidi kwa bidhaa hiyo.

Kaseka alibainisha kuwa alama ya ubora ya TBS ikiwa kwenye bidhaa huonesha kuwa bidhaa hiyo imepimwa na ina viwango vinavyokubalika kwa mlaji kwa kuzingatia matakwa ya kiwango cha bidhaa husika.

"Wananchi nunueni bidhaa zenye nembo ya shirika la viwango  kwani ni uthibitisho tosha kwa mzalishaji na mlaji kuwa bidhaa husika ni bora na salama kwa matumizi," alisema. 

Alibainisha kuwa Serikali imekuwa na utaratibu wa kutenga fedha

kila mwaka kwa ajili ya kuwasaidia wajasiriamali wadogo na wa kati ili kuhakikisha bidhaa wanazozalisha zinathibitishwa ubora wake.

Alisema katika mpango huo wa serikali, shirika la viwango limetoa

kipaumbele cha kuthibitisha na kutoa nembo za ubora wa bidhaa kwa wajasiriamali wadogo pasipo kulipia gharama yoyote kwa sababu ya mitaji yao bado midogo.

Ofisa huyo alisema kuna umuhimu wa kuhakikisha bidhaa zote zinazozalishwa na wajasiriamali wadogo hapa nchini zinakuwa na ubora unaotakiwa ili kuinua sekta ya uzalishaji na wazalishaji wote.

Alisema shirika lake limejipanga kuhakikisha elimu inaendelea kutolewa kwa wazalishaji wote ili kutambua umuhimu wa kutumia nembo ya ubora wa bidhaa zao.

Kaseka alisema mapambano ya kudhitibiti bidhaa hafifu ni ya Watanzania wote hasa watumiaji wa vyakula na bidhaa nyingine zinazozalishawa hapa nchini.

Author: Unknown

SHARE

• Share
• Tweet
• Share
• Pin
• Share

«

Next

Newer Post

»

Previous

Older Post