TAMWA YAAZIMISHA SIKU YA WANAWAKE DUNIANI

TAARIFA KWA VYOMBO VYA HABARI

 

Chama cha Wanahabari Wanawake –TAMWA kinavipongeza vyombo vya habari hapa nchini kwa ushirikiano wa hali na mali katika kutoa taarifa za kuelimisha umma juu ya maadhimisho ya Siku ya Wanawake Duniani ambayo kilele chake kilikuwa ni tarehe 8 Machi, 2017 ulimwenguni kote.

 

Vyombo vya habari vimekuwa mstari wa mbele katika Siku muhimu ya Wanawake Duniani kwani vilihakikisha vinatoa taarifa za kuhabarisha, kuhamasisha na kuelimisha taifa ambapo kumekuwa na mwamko wa jamii kutambua thamani ya mwanamke hapa nchini tofauti na ilivyokuwa hapo awali.

 

Siku ya Wanawake duniani kupitia vyombo vya habari mwaka huu wa 2017 ikiwa na kauli mbiu iliyosema “Tanzania ya Viwanda: Wanawake ni Msingi wa Mabadiliko ya Kiuchumi” imewafanya wanawake kupata mwamko katika siku yao hiyo na kukaa pamoja ili kujadili namna wanavyoweza kuondokana na changamoto wanazokumbana nazo hasa katika kufanya kazi za kuleta maendeleo kwao, familia na taifa kwa ujumla.

 

Kuwa vyombo vya habari vina nguvu ya kuleta mabadiliko chanya, vimekuwa mstari wa mbele katika kutoa elimu ambayo imekuza uelewa miongoni mwa jamii hasa kwa wanawake wametambua umuhimu wa kuhamasishana ndani ya jamii, Asasi za Kiraia, Sekta Binafsi, Taasisi za Serikali, Vyama vya Siasa, Wabia wa Maendeleo na wadau wengine hapa Tanzania ili kuongeza wigo wa fursa za kiuchumi kwa wanawake na kuwawezesha kushiriki na kunufaika na hatua za maendeleo.

 

Aidha; TAMWA inajivunia nguvu kubwa ya vyombo vya habari hapa nchini kwani imekuwa ikitoa mafunzo kwa waandishi mbalimbali wa habari ambapo Mpaka sasa zaidi ya waandishi 500 wameongezewa uelewa wa  jinsi ya kuandika habari za uchunguzi na zenye kuleta mbabadiliko ya kimaendeleo, kuleta usawa na kupinga ukatili wa kijinsia hapa Tanzania ambapo tunaamini na hao wamekuwa chachu kwa wengine.

 

Vuguvugu la Siku ya Wanawake lilianza mwanzoni mwa miaka ya 1900 kupitia kwa wanawake wafanyakazi wa sekta ya viwanda nchini Marekani walioandamana kupinga mazingira duni ya kazi zao, walilalamikia ukosefu wa huduma za kijamii na kuwepo kwa vitendo vya unyanyasaji katika ajira. Kutokana na hali hiyo, Umoja wa Mataifa ulianzishwa mwaka 1945; tarehe 8 Machi ikaridhiwa kuwa Siku ya Kimataifa ya Wanawake Duniani.

 

 

Edda Sanga

Mkurugenzi Mtendaji

Author: Unknown

SHARE

• Share
• Tweet
• Share
• Pin
• Share

«

Next

Newer Post

»

Previous

Older Post