Mgombea urais Korea Kusini aahidi kuimarisha uhusiano na Korea Kaskazini

SEOUL, Korea Kusini

KATIKA hali ambayo si ya kawaida, mgombea wa nafasi ya urais nchini kupitia chama cha Liberal, Moon Jae-In ameahidi kwamba endapo atafanikiwa kuibuka mshindi ataimarisha uhusiano na Korea Kaskazini.

Kauli hiyo ya Jae-In (pichani) inakuja wakati mamilioni ya wananchi nchini, leo walijitokeza kupiga kura kuchagua rais ambaye anatarajiwa kuchukua nafasi ya Park Geun-Hye ambaye aliondolewa madarakani baada ya kufunguliwa mashtaka ya ulaghai akiwa madarakani.

Uchaguzi huu unakuja katika kipindi ambacho kumekuwako na mdororo wa uchumi na uhusiano mbaya na nchi jirani ya Korea Kaskazini ambayo imekuwa ikitishia kulishambulia taifa hili kwa makombora yake.

Jae-In katika kampeni zake, amekuwa akiinadi sera hiyo ya kuimarisha uhusiano na taifa hilo na kusababisha baadhi ya vyombo vya habari Korea Kaskazini, kueleza kwamba wakazi wa taifa hilo wangependelea kuona uongozi mpya wa taifa hili ukirejelea maisha ya zamani ambapo mataifa haya mawili yalikuwa ya kishirikiana na kuwasiliana.

Mgombea huyo anayeegemea mrengo wa kushoto yuko kifua mbele, huku yule mwenye msimamo wa kadri Ahn Cheol-soo akiwa mpinzani wake mkubwa.

Moon anataka kuimarisha mawasiliano na Korea Kaskazini kinyume na aliyekuwa kiongozi wa taifa hili, Geun Hye ambaye alikata uhusiano wote na taifa hilo.

Wachambuzi wa mambo wanatarajia idadi kubwa ya watu kujitokeza huku idadi hiyo ikipigwa jeki na wapiga kura vijana huku Korea Kusini ikichagua rais kutoka kwa wagombea 13.

BBC

Author: Unknown

SHARE

• Share
• Tweet
• Share
• Pin
• Share

«

Next

Newer Post

»

Previous

Older Post