JK ALITIKISA BUNGE: BUNGE LAZIZIMA KWA NDEREMO NA VIFIJO WAKATI AKIINGIA KUMSINDIKIZA MKEWE MAMA SALMA KULA KIAPO

at 12:30 AM

Rais mstaafu wa awamu ya nne Dkt. Jakaya Kikwete, (katikati), akiwa na Katibuwa Bunge Dkt. Thomas Kashilila, (kushoto), na Katibu Mnyeka wa Spika wa Bunge, Bw.Said O. Yakubu, kwenye viwanja vya Bunge mjini Dodoma leo Aprili 4, 2017. Dkt. Kikwete akiwa na familia yake, alifika bungeni hapo kumsindikiza mkewe Mama Salma Kikwete ambaye alikuwa anakula kiapo cha kuwa mbunge baada ya kuteuliwa na Rais, Dkt. John Magufuli.

NA K-VIS BLOG, DODOMA

RAIS Mstaafu wa awamu ya nne Mhe. Dkt. Jakaya Mrisho Kikwete leo Aprili 4, 2017 amelifanya bunge la Jamhuri ya Muungano wa Tanzania lililoanza vikao vyake mjini Dodoma "kutikisika" baada ya nderemo, vifijo kulipuka baada ya Spika wa Bunge Mhe. Job Ndugai, aliposimama kumtambulisha kwa wabunge.

Kupitia matangazo ya moja kwa moja ya runinga kutoka Bungeni mjini Dodoma, Mhe. Ndugai alisema "tuna mgeni maalum hapa Bungeni nae si mwingine ni Rais mstaafu Mhe. Jakaya Kikwete"

Baada ya utambulisho huo ndipo vifijo vilipolipuka toka kwa wabunge wote wa CCM na upinzani ambapo wengine walisikika wakisema “tumeku-miss sana na tunakukumbuka.” Dkt. Kikwete akiwa na baadhi ya watoto wake, alimsindikiza mama Salma ambaye ameapishwa leo kuwa mbunge kufuatia Rais wa Jamhuri ya Muungano wa Tanzania, Dkt. John Pombe Magufuli, kumteua kuwa mbunge hivi karibuni.