Uhuru wa vyombo vya habari uheshimiwe

Julian Msacky

MEI 3 ya kila mwaka imetengwa maalumu na Umoja wa Mataifa (UN) kuadhimisha Siku ya Uhuru wa Vyombo vya Habari Duniani. 

Siku hii iliidhinishwa kwa mara ya kwanza na umoja huo mwaka 1993 kutokana na mabadiliko makubwa ya kisiasa na uchumi duniani.

Lengo la siku hii ni kuangalia changamoto zinazokabili waandishi na mazingira wanayofanya kazi kama yanaridhisha au la.

 Dk Harrison Mwakyembe Waziri mwenye dhamana ya habari

Si hivyo tu bali kutambua pia mchango wa waandishi waliopigania taalamu ya uandishi wa habari hadi tone la mwisho la maisha yao.

Kwa lugha nyingine ni siku muhimu kwa waandishi wa habari kutathmini na kupitia changamoto mbalimbali zinazoikabili sekta hiyo duniani.

Hata hivyo, wakati siku hii ikidhimishwa jambo la kusikitisha ni kuwa vyombo vya habari vinafanya kazi katika kipindi kigumu hususan Afrika.

Sababu kubwa ni kwamba viongozi wengi wanaviona vyombo hivyo kama adui wao wakati kwa vile tu vinasema mambo ya ukweli.

Ndiyo maana waandishi wanakamatwa, kushtakiwa na wakati mwingine maisha yao kuwa hatarini kutokana na kazi wanayofanya.

Ripoti ya Uhuru wa Vyombo vya Habari Duniani ya mwaka huu (2017) imeeleza mengi kuhusu hali halisi ya vyombo hivyo ilivyo duniani.

Kwa mujibu wa ripoti hiyo Namibia, Ghana na Cape Verde ndiyo zinazotoa uhuru mkubwa kwa vyombo vya habari kwa upande wa Afrika.

Hii maana yake kinachoendelea katika mataifa mengine ya Afrika ni ukandamizaji wa uhuru wa habari. Hii si habari njema hata kidogo.

Matokeo yake ni kwamba viongozi hawataki kuambiwa ukweli hata kama wanaongoza nje ya misingi ya utawala bora na sheria.

Nchi ambazo hazizingatii misingi hiyo kusema kweli maendeleo huwa duni na ujenzi wa utawala wa kidemokrasia hukosa mwenyewe.

Amani ndani ya nchi na mtu mmoja mmoja hufifia na watu kuishi kwa hofu kwa sababu tu ya kuwa na viongozi ambao si rafiki wa vyombo hivyo.

Ni katika mazingira hayo vyombo vya habari vinafanya kazi kwa kuchechemea na wakati mwingine vingine kukuta vikifungwa.

Si hivyo tu bali ni Afrika hii viongozi hutumia nguvu kubwa kutengeneza sheria kali ili vishindwe kufanyakazi kwa uhuru unaotakiwa.

Viongozi wanasahau kuwa bila uhuru wa vyombo vya habari hakuna maendeleo endelevu kwani mambo mengi hufanyika gizani.

Nchi zinazobana uhuru wa waandishi huishia kutumia nguvu nyingi katika mambo yasiyostahili na uonevu hutawala.

Ni kwa nini tunashindwa kujifunza kutoka nchi nyingine namna zinavyotoa uhuru mpana kwa vyombo vya habari na hakuna kinachoharibika?

Ripoti hiyo inasema Norway, Sweden, Finland zimeendelea kufanya vizuri katika kutoa uhuru wa vyombo hivyo pamoja na waandishi. 

Swali ni je, kuna tatizo gani katika nchi zetu za Afrika na mataifa mengine ambayo kuwa mwandishi ni sawa na kujitakia kifo.

Nchi zetu za Afrika hazitakiwa kuwa kama China, Vietnam, Korea Kaskazini au Syria ambako waandishi wanapitia tanuru la moto.

Viongozi hawana sababu ya kuogopa waandishi wala vyombo vya habari kwani vipo kwa ajili ya kutetea maslahi ya nchi na watu wake.

Mwasisi wa Taifa letu, Mwalimu Julius Nyerere alikuwa muumini mkubwa uhuru wa vyombo vya habari (freedom of press).

Mwaka 1970 alisisitiza uhuru wa vyombo vya habari ni jambo muhimu katika kujikita kwenye mijadala inayojenga nchi na maslahi ya watu.

Nyerere hakuishia hapo bali alisema vyombo hivyo ni ruksa kukosoa serikali pamoja na chama (TANU) na kuweka udhaifu wote hadharani.

Alitilia pia mkazo kuheshimu uhuru wa watu kujieleza akitambua kwamba hiyo ni haki ya msingi ikiwa ndani ya Katiba. 

Ni Nyerere huyo huyo aliyesema vyombo vya habari ni jicho la serikali kwa maana kuwa ili ifanyie kazi vizuri lazima imulikwe.

Katika mazingira ya namna hii hatuoni sababu ya viongozi wa zama hizi kuhofia vyombo vya habari na badala yake wanatakiwa kuvilea.

Kiongozi mwadilifu, mkweli na asiyetumia madaraka yake vibaya hana sababu ya kuhofia vyombo hivyo pamoja na waandishi wake.

Hii ina maana kuwa viongozi wanaochukia waandishi wa habari wana lao jambo na si kupigania maslahi ya nchi na watu wake.

Ni kwa sababu hiyo ninapenda kuwasilisha hapa kuwa viongozi wavilee vyombo vya habari kwa ustawi wa jamii pana na si vinginevyo.

Kwa msingi huo vitakuwa mhimili muhimu katika ujenzi wa taifa na kurutubisha utawala wa sheria ndani ya bara letu la Afrika.

Ni lazima tukumbuke kuwa kukandamiza vyombo vya habari ni sawa na kuruhusu shetani kutamba altareni jambo ambalo si sahihi hata kidogo.

Author: Unknown

SHARE

• Share
• Tweet
• Share
• Pin
• Share

«

Next

Newer Post

»

Previous

Older Post