Mratibu na Mtendaji Mkuu wa Chama
cha Kutetea Abiria (CHAKUA) Bw. Monday Likwepa akielezea changamoto
zinazowakabili abiria mbele ya Waandishi wa Habari (hawapo pichani),
katikati ni Mwenyejkiti wa Chama hicho Bw. Hassan Mchanjama, kulia ni
Mkurugenzi wa Kanda ya Mashariki na Katibu wa Marine Bw. Wilson
Sylvester Damo.
Mwenyekiti wa Chama cha Kutetea
Abiria (CHAKUA) Bw. Hassan Mchanjama akitoa ufafanuzi juu ya ukataji
tiketi kwa njia ya kieletroniki kwa wasafiri alipokuwa akizungumza na
Waandishi wa Habari (hawapo pichani), wa kwanza kutoka Kushoto ni Afisa
Miradi Taifa wa Chama hicho Bw. Elias Kalinga, katikati ni Mratibu
Mtendaji Mkuu wa Chama hicho Bw. Monday Likwepa
……………………
Na, Neema Mathias & Thobias Robert -MAELEZO
Chama cha Kutetea Abiria (CHAKUA),
kimeanzisha mikakati mbalimbali itakayotumika kukabiliana na changamoto
zinazowakumba wasafiri wa majini na nchi kavu hapa nchini.
Hayo yamesemwa Leo Jijini Dar es
Salaam na Mratibu Mtendaji wa CHAKUA Bw. Monday Likwepa alipokuwa
akizungumza na waandishi wa habari kuhusu changamoto zinazowakabili
abiria na namna ya kuzikabili, ikiwa ni pamoja na kuhakikisha kila
abiria anapata haki yake hasa pale anapopata tatizo akiwa safarini kwa
kutumia chombo cha moto au anapokuwa akitembea kwa miguu.
Likwepa alisema kuwa changamoto
hizo ni pamoja na abira kulanguliwa wanapokata tiketi kwaajili ya
safari, kuibiwa fedha, kupoteza mizigo, kulala mahali pasipostahili,
kukosa huduma za matibabu na fidia wanapopata ajali pamoja na njaa ya
kutwa nzima kwa kukosa huduma ya chakula na vinywaji ndani ya vyombo
husika vya usafiri.
“kutokana na changamoto hizo
CHAKUA tumekuja na mikakati ya kuhakikisha kuwa abiria anayepata ajali
na kusababisha ulemavu wa kudumu au kupoteza maisha anapata haki na
fidia stahiki, kusimamia kesi zote mahakamani pamoja na kuelimisha
abiria kujua haki na wajibu wa msafiri na msafirishaji mjini na vijijini
kwani abiria wengi wameonekana kutokuwa na elimu ya kutosha jambo
ambalo linapelekea kukosa haki zao za msingi,” alifafanua Likwepa.
Licha ya CHAKUA kuonyesha jitihada
mbalimbali za kumtetea abiria, wamekuwa wakikabiliwa na tatizo la
ukosefu wa rasilimali fedha kwani kwa muda mrefu wamekuwa wakitumia
fedha zao binafsi kutatua matatizo mbalimbali yanayowakabili abiria
jambo ambalo limekuwa likiwaelemea kwani changamoto za abiria huongezeka
siku hadi siku.
“Kwa mujibu wa katiba ya CHAKUA
vyanzo vya mapato yake ni ada za wanachama, wadau, na wahisani. Michango
hii imekua haitoshelezi kutekeleza majukumu yao ya kila siku, hivyo
ili kutekeleza majukumu yake kikamilifu CHAKUA inamwomba kila Mwanachama
alipe ada zake na kila abiria anaposafiri atalazimika kulipa sh 200 ili
kukiwezesha chama hicho kutekeleza majukumu yake ipasavyo,”alieleza
Likwepa.
Likwepa alifafanua kuwa kupitia
kupitia sh 200 ambayo itakua inalipwa na wasafiri wa mabasi na treni za
mikoani itawawezesha kujenga ofisi zao katika vituo vyote vya usafiri
nchini, halikadhalika fedha hizo zitatumika kuwasaidia wasafiri pale
wanapopata matatizo mbalimbali, mkakati huu utaanza rasmi pale mamlaka
zinazohusika na usafiri zitakaporidhia.
Kwa upande wake Mwenyekiti wa
CHAKUA Bw. Hassan Mchanjama ameitaka Serikali kuwalazimisha wenye
mabasi ya abiria kutumia mfumo wa kielektroniki katika ukataji wa tiketi
kwa wasafiri ili kudhibiti tatizo la ukwepaji kodi ambao umekua
ukifanywa na baadhi ya wamiliki wa mabasi kupitia Chama cha Wamiliki wa
Mabasi (TABOA).
“TABOA wamekuwa wakipinga mfumo wa
ukataji tiketi kwa njia ya kielektroniki ili kuendelea kuwalangua
abiria na kukwepa kutoa mapato sahihi kwa serikali,” alieleza Mchanjama
na kusisitiza, “serikali haina budi kukifuta chama hicho kwani wengi
wanaounda kikundi hicho sio wamiliki wa mabasi badala yake TABOA
wameweka madalali ambao ndio wanaohudhuria vikao vya serikali.”
Aidha Mchanjama ameiomba serikali
iwachunguze TABOA kwani wamekua wakitumia vyombo vya habari kupotosha na
kwenda hadi kwa viongozi wa Serikali Dodoma ili kuchelewesha zoezi la
abiria kukatiwa tiketi kwa mfumo wa kielektoniki, hivyo serikali haina
budi kukifuta chama hicho kwani wanaongoza kwa propaganda, hujuma,
fitina hata kudiriki kutoa rushwa ili kuchelewesha kuanzishwa kwa mfumo
huo.
CHAKUA kilianzishwa kwa malengo
ya kutoa huduma mbalimbali kwa wasafiri wanaopata adha katika safari zao
na kimesajiliwa kwa mujibu wa Sheria ya usafiri wa nchi kavu na majini,
Chama hiki kipo chini ya SUMATRA kwa ushirikiano mkubwa wa Jeshi la
Polisi na taasisi nyingine za kiserikali na kijamii.
SHARE
No comments:
Post a Comment