Julian Msacky
MKATABA ulioingiwa kati ya Uingereza mwaka 1929 uliipa Misri
mamlaka ya kutumia maji ya Mto Nile kwa kiwango kikubwa.
Mkataba huo umepigiwa kelele miaka nenda rudi kwa sababu
mataifa yanayochangia maji ya mto huo hayanufaiki kama ilivyo Misri.
Ndiyo maana mwaka 2010 mataifa manne yalikutana na
kukubaliana uwepo usawa katika matumizi ya maji hayo, lakini Misri ilikataa.
Mataifa hayo manne ni Ethiopia, Rwanda, Uganda na Tanzania.
Katika mkataba wao uliopewa jina Nile Basin Cooperative
Framework (CFA), mataifa hayo yaliazimia uwepo usawa huo.
Lengo ni kuondoa pia mkataba mwingine wa mwaka 1959 ambao
kimsingi uliendelea kuibeba Misri kunufaika zaidi na maji hayo.
Mkataba huo wa CFA ulikataliwa vikali na washiriki wa Misri katika
mkutano huo na kutoka nje. Hii ilikuwa Juni mwaka 2010.
Hadi leo hii Misri imeendelea kunufaika na maji ya Mto Nile
huku mataifa mengine yakionekana kuumia kimoyo moyo.
Swali linaloulizwa leo hii je, hali hii itaendelea hivi hadi lini?
Wengine wanafananisha hali hii na mvutano uliopo kati ya Palestina na Israel.
Kwamba Israel inaendelea kuishi kwa furaha kwa kutumia
jasho/rasilimali za Wapalestina kwa sababu tu ya kutokuwepo kwa usawa.
Lakini je, uchangiaji wa maji hayo ukoje? Sisi kama nchi
tunastahili kulalamika/kudai kwa nini hatujanufaika nayo inavyotakiwa?
Katika hili Rais Magufuli anasema pamoja na kwamba
hatujapakana kimipaka na Misri, lakini maji ya Mto Nile yameziunganisha nchi
hizo mbili kwani chanzo cha maji kwenda mto huo ni pamoja na Mto Kagera na maji
ya Ziwa Victoria ambalo asilimia 51 lipo Tanzania, asilimia 44 Uganda na tano
Kenya.
Rais Magufuli aliweka bayana suala hili wakati wa mazungumzo
kati ya Rais wa Misri, Abdel Fattah Al Sisi alipokuwa hapa nchini kwa ziara ya
siku mbili.
Kwa mtiririko wa Rais wetu ni kwamba Tanzania kwa kiwango
kikubwa inachangia kupeleka maji yake Mto Nile ambao kimsingi ni sawa na roho ya
Misri.
Tunafahamu kuwa mto huo ndiyo unaotegemewa kuifanya Misri
iendelee kuwepo kwani kwa kiwango kikubwa imezungukwa na jangwa.
Hii ikiwa na maana kuwa bila Mto Nile hakuna Misri na hivyo
maisha ya watu wake yanakuwa njia panda au ya matatizo.
Rais John Magufuli akiwa pamoja na Rais wa Misri, Abdel Fattah El-Sisi hivi karibuni.
Kutokana na umuhimu huo ni muda muafaka sasa kwa Tanzania
kuanza kunufaika na maji ya mto huo tofauti na ilivyo sasa.
Hata kama ipo mikataba ambayo ilisainiwa na wakoloni miaka
hiyo hatudhani kama ina tija kwa mazingira ya leo.
Kama tunachangia maji hayo kwa asilimia kubwa ni dhahiri tuna
haki pia kama nchi na watu wake kunufaika nayo kwa kiwango kizuri.
Ni kutokana na hali hiyo, tunashauri wakuu wa nchi hizo
waharakishe mazungumzo ili suala hilo lipatiwe ufumbuzi wa kudumu.
Hakuna sababu ya kuendelea kujivutavuta kwani kadiri siku
zinavyosogea ndivyo mahitaji ya maji duniani yanavyozidi kuongezeka.
Hii maana yake ni nini? Maana yake tunahitaji maji ya uhakika
ndani ya nchi hasa ikizingatiwa kuwa idadi ya watu inaendelea kuongezeka,
lakini maji hayaongezeki.
Ndiyo maana migogoro inayohusu maji imeanza kusikika huku na
kule, hivyo ni jambo jema suala la matumizi ya maji ya Mto Nile likapatiwa
ufumbuzi wa kudumu.
SHARE
No comments:
Post a Comment